Безумоўна, хваляваліся, аднак жа выступілі годна, сябе паказалі, на другіх паглядзелі. Першае месца не занялі, але дадому прыехалі і з дыпломам, і з падарункамі.
Па ўмовах праекта «Уладар сяла» яго ўдзельнікамі могуць быць маладыя сем’і (аднаму з сужэнцаў не больш за 31 год), якія жывуць у сельскай мясцовасці і маюць падсобную гаспадарку. Андрэй і Дар’я Лузан і іх сынок Яўгенка жывуць у Поўстцы, абодва працуюць у ААТ «Зары Камуны», Андрэй — тэхнікам-механікам, Дар’я — бухгалтарам па раслінаводстве. Між іншым, кіраўнік гаспадаркі Юрый Алёхна не тое што адпусціў работнікаў дзеля такой справы, а ўвогуле быў задаволены, што менавіта іх маладыя спецыялісты будуць прадстаўляць раён, і ўсяляк дапамагаў. Думаецца, такая акалічнасць надавала нашым канкурсантам упэўненасці і натхнёнасці.
«Вітаем па-беларуску», «Па дровы», «Сіўка-Бурка», «Сельская спартыўная эстафета», «Выстава дасягненняў сямейнай гаспадаркі», «Лепшы сельскі падворак» і «Сюрпрыз» — гэтыя сем этапаў трэба было пераадолець удзельнікам. Да конкурсу візітовак і падвор’яў рыхтаваліся, зразумела, дома, загадзя, а ўсё астатняе — экспромт. Папіліць, пакалоць і скласці дровы, запрэгчы (мужу) і распрэгчы (жонцы) каня, спавіць немаўля (тата) і забіць роўненька-акуратна цвік (гэта ўжо мама)... З усімі заданнямі сям’я Лузан справілася, а як найлепшую яе адзначылі ў намінацыі «Самая гаспадарчая».
«Добра, што ў нас, тым болей у вёсцы, ёсць такая актыўная моладзь, такія творчыя маладыя сем’і, — зазначыла першы сакратар Глускага райкама БРСМ Кацярына Ізвозчыкава. — Калі мы прапанавалі ім удзел у конкурсе, то Андрэй і Даша крыху разгубіліся, але толькі напачатку. Там жа, на галоўнай пляцоўцы конкурсу, не выдалі ні на хвілінку свайго хвалявання. Упэўнена, гэта не першае наша з імі сумеснае мерапрыемства».
Аксана ВАСІЛЕЎСКАЯ
Фота дадзена райкамам БРСМ