На сяўбе ранніх зерневых і зернебабовых культур у «Глускай Зары» лепшы вынік — у Васіля Слука. Задае тэмп у рабоце вопытны механізатар не першы год, трапляе ў лік лідараў, перадавікоў на падрыхтоўцы глебы і на сяўбе. На трактары «МТЗ-3522» гэтай вясной ён пасеяў 730 гектараў зерневых і зернебабовых, безумоўна, добра пашчыраваў на палях. Увогуле гэтыя культуры ў гаспадарцы занялі больш за 800 гектараў. Стараннасць Васіля Слука адзначыў галоўны аграном ААТ «Глуская Зара» Артур Бубіч. «Механізатар адказны, — расказаў ён, — на палях з ранку да позняга вечара, выконвае ўсё, як трэба, па тэхналогіі. А іначай і быць не можа: больш за 25 гадоў ён аддаў сельскай гаспадарцы».