Па тэмпах сяўбы сярод гаспадарак лідарства трымае эксперыментальная база «Глуск», дзе гэта работа выканана на 98 працэнтаў (пасеяна 696 га). Больш як на 82 працэнты справіліся з сяўбой ранніх яравых у РАПТЗ (500 га), 720 гектараў засеялі ў «Глускай Зары», што складае 78,4 працэнта, у аграфірме «Слаўгарадскі» з планавых 850 гектараў пасеялі 674 (79 працэнтаў). Пакуль што невялікі працэнт выканання (55,6) і невялікія плошчы па сяўбе ранніх яравых (114 га) у ААТ «Турыно-агра».
Акрамя гэтага, гаспадаркі сеюць аднагадовыя травы: пры плане 1200 гектараў фактычна пасеяна 730, а таксама падсяваюць шматгадовыя: 319 гектараў пры плане 450. Кукурузу сяголета, як і летась, сеюць на зерне і на сілас, агульная плошча, запланаваная пад гэтую культуру, 5700 гектараў, пасеяна ўжо 900.
Не застаюцца па-за ўвагай палеткі з азімымі: праведзена першая і завяршаецца другая падкормка азімых зерневых на зерне, падкормлена больш за 3800 гектараў. Апрацавана супраць пустазелля больш як 2000 зерневых культур, у асноўным гэта азімы ячмень (1860 га).
Вызначыць самы важны ўчастак сярод комплексу веснавых работ, бадай што, немагчыма, адзначае аграном ААТ «БНБК-АГРА Глуск» Уладзімір Прыгара, яны ўсе паміж сабой звязаны, тэмпы і якасць выканання патрэбны паўсюль. Згодна з даручэннем губернатара сяголета сяўбу патрэбна завяршыць да 20 мая. У нашым раёне ў гэтай сувязі найбольшых намаганняў патрабуе кукуруза, бо менавіта пад гэтую культуру адведзены найбольшыя плошчы: 1200 гектараў плануецца пасеяць на зерне, 4500 — на сілас. Пасля гэтага застанецца правесці перазалужэнне лугапашавых угоддзяў, а затым надыдзе час пераключацца на доглядавыя работы.