Зараз тут утрымліваецца 103 галавы асноўнага статка, з іх 100 кароў доіцца. З пачатку года на ферме ішло паступовае павышэнне ўдояў, за сакавік яны склалі 13,24 кілаграма, а па выніках трох месяцаў сярэдні ўдой на карову — 10,2 кілаграма, гэта чацвёрты паказчык сярод усіх ферм раёна.

Вытворчасць малака за сакавік тут павялічылася на 350 кілаграмаў. Зразумела, што добрага выніку можна дабіцца толькі зладжанай працай калектыву. Менавіта так, зладжана, адказна і старанна, на МТФ «Глуск» працуюць аператары машыннага даення Дзмітрый Сітнік, Жанна Гарбуновіч, Святлана Алёхна (яна падменная даярка) і іх брыгадзір Іна Фядосава. За добрыя вынікі ім і падзякавалі старшыня прафкама работнікаў аграпрамысловага комплексу Генадзь Ліпскі і намеснік начальніка ўпраўлення па сельскай гаспадарцы і харчаванні райвыканкама Алена Кузьміна. Падарункамі жывёлаводам сталі электрачайнік і прыгожыя шкляныя кубкі — для ўсіх 11 работнікаў, што працуюць на ферме, а таксама цукар, кава і чай. «Гэту акцыю наш галіновы прафсаюз праводзіць разам з нашым сацыяльным партнёрам — упраўленнем па сельскай гаспадарцы. Мы ўдзячны людзям за працу, — кажа Генадзь Ліпскі, — і вырашылі заахвоціць іх такімі падарункамі, каб у вольную хвіліну можна было адпачыць, падсілкавацца, штосьці абмеркаваць за кубачкам кавы ці чаю. Усё гэта патрэбныя людзям рэчы».